Jose Azevedo, shoferi i kamionit që ndodhej pranë vendit të aksidentit tragjik ku humbën jetën futbollisti Diogo Jota dhe vëllai i tij, Andre Silva, ka dalë publikisht duke kundërshtuar disa nga konkluzionet e raportit të fundit të policisë spanjolle. Sipas tij, informacionet që janë bërë publike nuk përputhen me atë që ai pa dhe përjetoi natën e ngjarjes.

Të martën, autoritetet spanjolle publikuan një raport ku thuhej se Diogo Jota ishte duke e drejtuar vetë automjetin tip Lamborghini në momentin e aksidentit dhe se automjeti ishte mbi shpejtësinë e lejuar kur i shpërtheu njëra nga gomat. Raporti gjithashtu sugjeron se kjo ishte një nga arsyet kryesore që çoi në humbjen e kontrollit të makinës dhe përplasjen fatale, transmeton lajmi.net.

Por Jose Azevedo, i cili thotë se ka filmuar momentin e aksidentit dhe ishte një nga personat e parë që ndaloi në vendngjarje, ka hedhur poshtë pretendimet se automjeti ishte duke lëvizur me shpejtësi të lartë. Ai tha se menjëherë pas aksidentit është përpjekur të ndihmojë, por fatkeqësisht nuk ka mundur të bëjë asgjë për të shpëtuar jetën e dy të rinjve. “E filmova, u ndala, u përpoja të ndihmoja, por për fat të keq nuk munda të bëj asgjë. Kam ndërgjegje të pastër. E di çfarë përjetova atë natë, sepse nuk e dija kush ishte brenda,” tha ai, duke shtuar ngushëllimet për familjen e viktimave.

Ngjarja tronditi opinionin publik në Portugali dhe më gjerë, pasi Diogo Jota, një prej futbollistëve më të njohur të kombëtares portugeze dhe anëtar i Liverpool-it, ishte një figurë shumë e dashur për tifozët dhe komunitetin sportiv. Hetimet për aksidentin vazhdojnë, ndërkohë që autoritetet janë ende duke analizuar të gjitha dëshmitë dhe provat nga vendngjarja.

“Unë ngas në këtë rrugë çdo ditë, nga e hëna në të shtunë. E njoh mirë, e di se çfarë rruge është – dhe është e pavlerë,” ka deklaruar Jose Azevedo, shoferi i kamionit që dëshmoi aksidentin tragjik në të cilin humbën jetën Diogo Jota dhe vëllai i tij, Andre Silva. Ai theksoi se kushtet e rrugës janë të rrezikshme dhe mund të kenë ndikuar në fatkeqësinë që ndodhi.

Ndërkohë, gazeta spanjolle MARCA raportoi se një tjetër shofer kamioni ka dalë me një deklaratë të ndryshme, duke pretenduar se Lamborghini me të cilin po udhëtonin Jota dhe Andre e kishte tejkaluar atë rreth pesë minuta para përplasjes. Sipas tij, automjeti po udhëtonte me një “shpejtësi mesatare”, duke lënë të kuptohet se nuk ka pasur tejkalim të dukshëm të kufirit të shpejtësisë në atë moment.

Aksidenti ndodhi javën e kaluar në provincën spanjolle të Zamorës dhe ka tronditur të gjithë komunitetin e futbollit. Sipas autoriteteve lokale, automjeti tip Lamborghini doli nga rruga pas shpërthimit të një gome dhe më pas u përfshi nga flakët, duke rezultuar fatal për dy vëllezërit.

Humbja e Diogo Jotës, yllit të Liverpoolit dhe një prej lojtarëve më të spikatur të kombëtares së Portugalisë, ka ngjallur dhimbje të madhe në mesin e bashkëlojtarëve, tifozëve dhe figurave të futbollit në mbarë botën. Që nga lajmi për vdekjen e tij, klubet, lojtarët dhe dashamirët e sportit kanë shprehur ngushëllime dhe solidaritet me familjen e tij./lajmi.net/