Jamie Vardy, legjenda e Leicester Cityt, është gati për një aventurë të re në futbollin italian.

Sipas raportimit të Fabrizio Romanos, sulmuesi anglez ka arritur marrëveshje me klubin italian Cremonese për një kontratë njëvjeçare, me opsion për zgjatje edhe për një sezon tjetër nëse skuadra arrin të mbetet në elitën e Serie A, transmeton lajmi.net.

Lajmi vjen pak pasi Cremonese ka nisur sezonin në mënyrë mbresëlënëse, duke grumbulluar gjashtë pikë në dy ndeshjet e para. Transferimi i Vardyt shihet si një përforcim i madh për objektivat ambicioze të klubit.

Vardy do të mbërrijë në Itali sonte, ndërsa pritet të prezantohet zyrtarisht gjatë ditëve në vijim. Sulmuesi 37-vjeçar është lojtar i lirë pasi kontrata e tij me Leicester City skadoi këtë verë, duke i dhënë mundësinë të transferohet pa pagesë te Cremonese.

Ky është një kapitull i ri për Vardyn, i cili ka qenë figurë kyçe në suksesin historik të Leicesterit në Premier League dhe në garat evropiane./lajmi.net/