Deputetja e Partisë Demokratike të Kosovës (PDK), Ganimete Musliu, ka kritikuar kryeministrin Albin Kurti për mosparaqitjen para Prokurorisë Speciale, duke ngritur pikëpyetje për mesazhin që, sipas saj, një sjellje e tillë u përcjell personave që duhet të japin llogari para drejtësisë.

Përmes një reagimi, Musliu ka vlerësuar se mosrespektimi i thirrjeve të Prokurorisë nga kreu i Qeverisë mund të krijojë bindjen se përballja me drejtësinë është çështje vullneti dhe jo obligim ligjor, transmeton lajmi.net.

“Pse të mos trimërohen kriminelët në Kosovë, kur nga vetë kreu i shtetit u krijohet bindja se përballja me drejtësinë është çështje zgjedhjeje dhe jo detyrim ligjor?”, ka shkruar Musliu.

Ajo ka pyetur se çfarë shembulli po u jepet qytetarëve kur kryeministri, sipas saj, nuk i përgjigjet për muaj të tërë ftesës së Prokurorisë për intervistim.

“Kur kryeministri i vendit, për muaj të tërë, nuk i përgjigjet ftesës së Prokurorisë për intervistim, çfarë mesazhi u dërgohet qytetarëve dhe çfarë shembulli u jepet atyre që duhet të japin llogari para ligjit?”, ka deklaruar deputetja e PDK-së.

Musliu ka theksuar se zbatimi i ligjit duhet të nisë pikërisht nga udhëheqësit e institucioneve, duke rikujtuar se askush nuk duhet të ketë imunitet nga përgjegjësia para drejtësisë.

Ndryshe, Kurti nuk u është përgjigjur thirrjeve të Prokurorisë Speciale për t’u paraqitur në cilësinë e dëshmitarit lidhur me hetimet për çështjen e rezervave shtetërore./lajmi.net/