Kim Kardashian është prekur nga një gjendje shëndetësore që sjell kujtime të dhimbshme për sëmundjen nga e cila vdiq babai i saj, Robert Kardashian, në moshën 59-vjeçare.

Traileri më i fundit i sezonit të tetë të serialit “The Kardashians” zbulon se Kim është shtruar në spital për shkak të ezofagitit, një inflamacion ose irritim i shtresës së brendshme të ezofagut.

Roberti, avokat i cili u bë i njohur për mbrojtjen e O.J. Simpson në gjyqin e tij për vrasje, vdiq nga kanceri i ezofagut në vitin 2003.

“Kam diçka që quhet ezofagit”, i thotë Kim ekipit të saj të grimit, përpara se të shfaqet e shtrirë në një shtrat spitali, e lodhur, ndërsa stafi mjekësor kujdeset për të.

Më pas, një mike e Kim-it e pyet nëse kjo është e njëjta sëmundje nga e cila vdiq Roberti.

“Nuk mundem… vetëm kjo më bën të qaj”, thotë në video nëna e Kim-it, Kris Jenner.

Kris ishte e martuar me Robertin për 13 vjet dhe së bashku patën katër fëmijë: Kim, Kourtney, Khloé dhe Robert Jr. Ata u divorcuan në vitin 1991.

Roberti vdiq katër vjet përpara se familja e tij të bëhej e famshme në mbarë botën me reality-show-n e E!, “Keeping Up With The Kardashians”.

Në vitin 2023, Kim kujtoi një nga bisedat e fundit që pati me të atin para vdekjes së tij, në një intervistë për GQ.

Ajo tregoi se ai i kishte thënë:

“E di që do të jesh mirë. Është thuajse sikur mund të shoh përpara. E di që do të jesh mirë, por vetëm kujdesu për vëllezërit dhe motrat e tua për mua. Vetëm sigurohu që të kujdesesh për ta.”