Unitedi e fiton derbin, ia shtyn festën e titullit Manchester Cityt
Manchester Unitedit i ka takuar përballja dramatike e ‘Etihad Stadium’ kundër Manchester Cityt, skuadër të cilës ia shtyu edhe festën e titullit.
Sport
Skuadra e Jose Mourinho ka arritur që me përmbysje nga 2:0 në 2:3, të mposht skuadrën e Manchester Cityt në udhëtim.
Kjo përballje, u veçua me dy pjesë të ndryshme, me Cityn që dominoi të parën, dhe Unitedin që përmbysi gjithçka në pjesën e dytë.
Ishte Manchester City që e dominoi në tërësi pjesën e parë, ku arriti të shënoi edhe dy gola, për epërsinë 2:0.
Kompany në minutën e 25’ u gjet mirë në zonën e Unitedit, për ta dërguar në rrjetë topin pas një goditje të fortë me kokë.
Pesë minuta më vonë, City realizoi edhe golin e dytë me anë të Gundogan.
Deri në fund të pjesës së parë, skuadra e Guardiolas kishte mundësi të shënonte sërish, po të tregohej më i vëmendshëm anglezi Sterling, që lëshoi raste të mira shënimi.
Manchester United hyri krejt me një fytyrë tjetër në pjesën e dytë.
Ishte fillimisht i shumëkritikuari Paul Pogba që arriti të realizonte dy herë për tre minuta (53’ dhe 55’), për të barazuar rezultatin.
United vazhdoi me lojë të mirë, dhe në minutën e 69’ përmes Smalling, shënoi për të përmbysur rezultatin në 2:3, rezultat që mbeti i pandryshuar deri në fund të ndeshjes.
Me këtë humbje, City duhet të pres xhirot e ardhshme për të festuar titullin, ndërsa United forcon pozitën e dytë./Lajmi.net/