Ndeshja e ekipeve kombëtare të futbollit për femra, Shqipëri- Francë do të zhvillohet në masa të rrepta sigurie.

Kjo dhe për shkak të zhvillimeve të fundit në të gjithë botën, në kuadër të luftës kundër terrorizmit.

Policia e Tiranës bën të ditur se për ndeshjen, që do të zhvillohet në stadiumin “Qemal Stafa” në orën 21.00, është hartuar një plan masash.

Për mbarvajtjen e këtij takimi nga ora 18.00 deri në orën 24.00 të së premtes do tëbllokohen të gjitha segmentet rrugore që të çojnë te stadiumi kombëtar, përcjell “Albeu.com”.

Gjithashtu nuk do të lejohet parkimi i automjeteve, si dhe do të mbyllen ambientet tregetare përreth tij. Do të bllokohen rrugët “Dervish Hima”, “Asim Zeneli”, “Themistokli Germenji”, Rruga “Papa Gjon Pali” deri te kryqëzimi i TVSH-së dhe Sheshi “Nënë Tereza”.

Nga shërbimet e Policisë do të ushtrohen kontrolle të vazhdueshme ndaj shtetasve të ndryshëm, përdorues të rrugëve të mësipërme.  Kujtojmë që hyrja në stadium është falas.