Man Utd sërish pas Fabregasit
Manchester United është i gatshëm të hidhet sërish në sulm për transferimin e mesfushorit të Barcelonës, Cesc Fabregas, gjatë afatit kalimtar të verës. Ylli spanjoll spekulohet se do të largohet nga Camp Nou.
Sport
Manchester United ka ringjallur interesimin për Cesc Fabregasin pas njoftimeve se Barcelona ka njoftuar futbollistin se do të konsiderojë ofertat që vijnë për të.
United bëri përpjekje për angazhimin e ish kapitenit të Arsenalit gjatë verës së vitit të kaluar, por pavarësisht tri ofertave të ndryshme, Barcelona refuzoi ta shiste.
Marrëveshja dështoi dhe United u detyrua të kërkojë dikë tjetër.
Mirëpo, sipas mediave spanjolle, Fabregas është njoftuar se mund të jetë një prej futbollistëve që do të largohet nga klubi gjatë afatit kalimtar të verës – nëse klubi e fiton ankesën për heqjen e dënimit të FIFA-së që ua pamundëson shitblerjen e futbollistëve deri në verën e vitit 2015 – dhe United është rikthyer pas tij.
United besohet se vlerëson mesfushorin spanjoll në rreth 25 milionë funte dhe mund të kërkojë prej tij që të përmbush mungesën në mesfushën e ekipit të menaxherit David Moyes.