Michael Carrick thotë se Manchester United do të kthehet në Ligën e Kampionëve, pas eliminimit nga Bayrern Munichu të mërkurën mbrëma.

Golat e Mario Mandzukic, Thomas Muller e Arjen Robben ia siguruan fitoren 3:1 ekipit të Pep Guardiolas, që e shkriu avantazhin e përkohshëm të ‘Djajve të Kuq’, të regjistruar nga Patrice Evra.

Ekipi nga Old Traffordi është larg kualifikimit në këtë kompeticion për sezonin tjetër, pasi ekipi i David Moyes gjendet shtatë pikë prapa pozitës së katërt, të cilën e zë Arsenali, por Carrick është i bindur se gjiganti anglez do të kthehet në pozitën që çon në Evropë.

“Kjo nuk ishte e mirë. Ne e kemi thënë këtë edhe javë më parë. Ky klub duhet të jetë në Ligën e Kampionëve”, tha fillimisht mesfushori anglez për Sky Sports.

“E dinim se do të ishte e vështirë sonte, por arsyeja se përse ne mund të mos shkojmë në Ligën e Kampionëve është sepse liga është mjaft e balancuar këtë sezon. Ne do t’i marrim përgjegjësitë për këtë, kemi pasur rezultate të këqija dhe së fundmi e kemi paguar këtë”.

“Do të mundohemi ta mbyllim sezonin sa më mirë që të mundemi dhe do të fillojmë sërish sezonin tjetër, duke besuar se do të luftojmë për titull sërish. Kështu mund të mendojmë tash”.

“Championsi është ajo ku duam të jemi, aty ku ishim për një kohë të gjatë dhe aty ku do të kthehemi. Jam i sigurt, në një distancë jo shumë të largët”, përfundoi Carrick.