Një tjetër futbollist ndërron jetë në fushë (Video)
Mbrojtësi i skuadrës argjentinase, Atletico Parana, Cristian Gomez ka ndërruar jetë në fushën e futbollit, më saktësisht në ndeshjen që skuadra e tij ishte duke e zhvilluar kundër Boca Unidos.
Sport
Argjentina ka pësuar një tjetër goditje të rëndë, pasi vetëm dhjetë ditë pas vdekjse së lojtarit, Emanuel Ortega, tashmë ka ndodhur edhe një tjetër rast tragjik.
Mbrojtësi i Atletico Paranas, Cristian Gomez ka ndërruar jetë teksa ishte duke luajtur kundër skuadrës së Boca Unidos.
Kishin kaluar vetëm 30 minuta nga fillimi i ndeshjes. Gjithçka dukej se po shkonte në rregull, deri në momentin kur 27-vjeçari u pa i shtrirë krejt papritur.
Lojtarët nuk dinin ç’të bënin, hoqën fanellat dhe u munduan ta freskonin, ndërkohë që mjekët po i jepnin ndihmën e parë.
“Bëmë gjithçka për ta mbajtur gjallë, por ai ndërroi jetë gjatë rrugës për në spital nga një atak në zemër”, tha mjeku i skuadrës vendase Miguel Darre.
Ndërsa, delegati i ndeshjes tha se kjo që ndodhi ishte diçka krejt e papritur, pasi Gomez nuk kishte pasur kurrë më parë ndonjë problem serioz me shëndetin.