Ndërmarrja “Trepça” ka njoftuar se ka nxjerrë një kristal të përmasave të mëdha nga nëntoka.

Ndërmarrja ka falënderuar punëtorët që me profesionalizëm mundën ta nxjerrin këtë kristal.

“Nga nëntoka madhështore e Trepçës – një kristal madhështor! Me krenari të veçantë ndajmë me ju nxjerrjen e këtij kristali të jashtëzakonshëm nga thellësitë e minierës sonë, me përmasa mbresëlënëse: 1.40 metra lartësi dhe 1.20 metra gjerësi. Një falënderim i veçantë shkon për minatorët e Horizontit XI – Ndërrimi C, të cilët me profesionalizëm, përkushtim dhe guxim të përditshëm bënë të mundur nxjerrjen e këtij thesari natyror nga zemra e nëntokës së Trepçës”.

“Trepça” tha se ky kristal nuk është vetëm një formacion i rrallë mineralogjik – “ai është simbol i punës së palodhur, traditës shekullore dhe shpirtit të pathyeshëm të minatorit të Trepçës”.

“Respekt për çdo minator që çdo ditë zbret në thellësi për të nxjerrë pasuritë e vendit tonë!”.