Dhoma Ekonomike e Grave të Kosovës (G7) u ka bërë thirrje partive politike që të dakordohen për çështjen e presidentit dhe të shmangin zgjedhjet, sepse sipas tyre kjo është një dëmtim i madh për ekonominë e vendit.

Në një njoftim G7 ka thënë se Kosova ka nevojë për stabilitet institucional edhe ekonomik dhe se e kundërta e kësaj shkakton dëme ekonomike tek bizneset vendore.

“G7 u bën thirrje të gjitha partive politike që të gjejnë zgjidhje përmes dialogut dhe bashkëpunimit të sigurojnë funksionimin normal të institucioneve të vendit, dhe të shmangin situata që mund të çojnë vendin në zgjedhje të reja,duke vendosur interesin ekonomik të Kosovës dhe mirëqenien e qytetarëve mbi dallimet politike”, thuhej në njoftim.

“Ndërmarrjet mirko, të vogla dhe të mesme, veçanërisht bizneset në pronësi të grave dhe bizneset familjare, janë më të cenueshmet ndaj paqëndrueshmërisë ekonomike, pasi ato operojnë me rezerva të kufizuara financiare dhe janë më të ekspozuara ndaj rritjes së çmimeve të energjisë, rritjes së kostove operative dhe pasigurisë në treg”, thuhej tutje.