190 mijë euro gjatë 2024 për kompensimin e viktimave të krimit, rriten kërkesat
Trefish më shumë kërkesa janë paraqitur në ministrinë e Drejtësisë në dy vitetet e fundit për kompensimin e viktimave të krimit. Derisa nga kjo ministri kanë treguar se vetëm gjatë këtij vitit kanë pasur rreth 130 kërkesa, shuma e kompensimit është 190 mijë euro. Mbi 613 mijë euro është shuma e kompensimit të viktimave të…
Lajme
Trefish më shumë kërkesa janë paraqitur në ministrinë e Drejtësisë në dy vitetet e fundit për kompensimin e viktimave të krimit. Derisa nga kjo ministri kanë treguar se vetëm gjatë këtij vitit kanë pasur rreth 130 kërkesa, shuma e kompensimit është 190 mijë euro.
Mbi 613 mijë euro është shuma e kompensimit të viktimave të krimit, nga Ministria e Drejtësisë, nga viti 2021 deri më tash.
Ndërkohë që gjatë kësaj periudhë janë rritur edhe kërkesat e viktimave për të fituar të drejtën e kompensimit në rastet e tyre.
Sipas përgjigjes së ministrisë së Drejtësisë, në vitin 2021 kanë qenë 57 kërkesa, nga to 29 janë aprovuar, ndërkohë që nga janari e deri në shtator të 2024, kanë qenë 135 kërkesa nga to 95 të aprovuara.
Nga të gjitha kërkesat vërehet se gjinia femrore dominon më shumë.
“Në vitin 2022 është ndryshuar ligji dhe është bërë ligji i ri sipas të cilit, janë rishikuar edhe kriteret edhe afati për parashtrimin e kërkesës edhe janë lehtësuar kërksat dhe në rrjedhe të kësaj është kjo arsye kryesore që është rritur numri i kërkesave edhe numri i aprovimeve të kërkesave, ajo çka mbetet esenciale është që MD-ja së bashku me këshillin gjyqësor dhe atë prokurorial, fondet që gjenerohen prej këtyre dy këshillave të barten te md në mënyrë që kompensimi i viktimave të mos jetë barrë e shtetit”, ka theksuar ai për RTV Dukagjini.
Ndërkohë që në Institutin e Kosovës për Drejtësi rritjen e kërkesave për kompensim e shohin si një hap pozitiv e që duhet vazhduar edhe më tutje me vetdijësimin e personave që mund të jenë përfitues.
“Në të kaluarën d.m.th që nga miratimi i këtij ligji dhe funksionalizimi i këtij fondi njëra prej problemeve ka qenë mungesa e kërkesave per shkak se nuk ka qenë shumë i njohur kjo formë e kompensimit dhe në një masë të konsiderueshme viktimat nuk i kanë ditur të drejtat e veta që kanë në raport me këtë fond dhe janë bërë vazhdimisht përpjekje që të promovohet kjo”, ka deklaruar Gzim Shala – Hulumtues në IKD.
Programi për kompensimin e viktimave të krimit është i rregulluar me ligj dhe financohet nga buxheti i shetit.
Programi ia mundëson viktimave të veprave të dhunshme të kompensueshme të aplikojnë për kompensim financiar për dëmet si pasojë e veprës penale, në rast se kjo nuk mund të kompensohet nga i pandehuri.
Ministria e Drejtësisë së fundmi ka thënë se edhe viktimat që dalin nga gjykimet në dhomat e specializuara në Hagë, duhet të aplikojnë për kompensim përmes këtij programi.