U raportua pak ditë më parë se Roberto Firmino ka vendosur të largohet nga Liverpooli në fund të sezonit dhe agjenti i tij ka konfirmuar se për momentin është i fokusuar ekskluzivisht në objektivat e klubit këtë sezon.

Braziliani vendosi të gjejë një ambient të ri pas tetë vitesh. Ai erdhi në Liverpool në vitin 2015, me këtë skuadër fitoi Champions League dhe u bë kampion i Anglisë.

Mediat angleze javën e kaluar raportuan se ai tashmë i kishte thënë Kloppit se dëshiron të largohet nga klubi, por se kjo nuk do të ndikojë në lojërat e tij dhe se ai është i fokusuar në këtë sezon.

“Në këtë moment nuk po mendojmë për oferta dhe nuk po themi atë që kemi në tavolinën tonë. Roberto është 100 për qind i përkushtuar ndaj detyrave të tij në Liverpool dhe dëshiron të ndihmojë klubin të fitojë një vend në Ligën e Kampionëve për sezonin e ardhshëm. Ky është plani, dhe kur të përmbushen qëllimet, ai dhe familja do të fillojnë të mendojnë se çfarë është më e mira për ta”, tha agjenti i tij në një intervistë.

Firmino ka luajtur 354 ndeshje në total për Liverpoolin, duke shënuar 108 gola dhe duke ndihmuar skuadrën me 79 asistime./Lajmi.net/