Barcelona e ka fituar ndeshjen e parë gjysmëfinale kundër Real Madridit në Kupën e Mbretit.

“Katalunasit” triumfuan 0:1 kundër Real Madridit në stadiumin “Santiago Bernabeu”.

Trajneri i Barcelonës, Xavi Hernandez pas ndeshjes u shpreh i lumtur me fitoren në Madrid, por jo edhe me lojën e futbollistëve të tij.

“Rezultati është shumë pozitiv. Jam i kënaqur me punën, mbrojtjen e fortë, Real Madridin e minimizuar në fushën e tyre. Loja ishte e vështirë. Fitorja është e jashtëzakonshme”, tha Xavi pas ndeshjes në konferencë për media, njofton Marca, transmeton lajmi.net.

“Nuk dinim ta mbanim topin, ishte e vështirë për ne të fitojmë duele në fushën e Madridit. Jemi mbrojtur mirë pa top. Kemi luftuar mirë pa top. Jam i kënaqur, por duhet të përmirësohemi në lojën me topin. Jam i kënaqur me rezultatin dhe jo aq për ndeshjen”.

“Kjo nuk është ndeshja që duam. Ne duam të krijojmë më shumë raste shënimi. Nuk është loja që duam. Ka raste kur kundërshtari mund t’ju dominojë”, shtoi ai.

Ndeshja e radhës do të zhvillohet në stadiumin “Camp Nou”.

Fituesi i këtij takimi, luan në finale me fituesin e duelit tjetër gjysmëfinal mes Osasunës dhe Athletic Bilbaos./Lajmi.net/