Përfaqësuesja e Kosovës pësoi humbje 3:1 nga Senegali të dielën në Gjenevë, por kjo nuk nënkupton se ekipi i Albert Bunjakut shfaqi lojë të dobët.

Madje, Kristian Nushi insiston se Kosova bëri paraqitje të mirë dhe se mund të përmirësohet edhe më shumë në të ardhmen.

“Unë po mendoj se ishte një paraqitje e mirë. Në pjesën e parë shkoi mirë, por në të dytën i morëm dy gola të shpejtë, kjo nuk na duhej”, deklaroi fillimisht futbollisti gjakovar.

“Përderisa jemi të organizuar, gjithçka shkon mirë, por sapo fillojmë të hapemi, e humbim organizimin. Senegali ka qenë i shkëlqyeshëm. Mendoj se me punë mund të arrijmë shumë”, përfundoi Nushi.