Ryan Giggs ka kërkuar që të mbrohet më shumë Adnan Januzaj, pasi mesfushori kosovar u lëndua pas një ndërhyrjeje të mesfushorit të Hull Cityt, David Meyler, të martën mbrëma.

Meyler mund të dënohet nga Federata Angleze, pasi e shkeli këmbën e talentit të Manchester Unitedit.

Nëse gjyqtari Craig Paëson konfirmon të mërkurën se nuk e ka parë këtë rast, atëherë FA mund ta marrë vendimin që t’ia pamundësojë atij pjesëmarrjen në finale të FA Cup ndaj Arsenalit, ndeshje kjo që do të zhvillohet të shtunën.

E ndërkohë, uellsiani, njëkohësisht trajner dhe lojtar, ka kërkuar nga referët të jenë më syhapur, për ta mbrojtur 19 vjeçarin në raste të tilla.

“Është hera e dytë që i ndodh kjo gjatë këtij sezoni. Nuk ishte ndjenjë e mirë ta shihje, këmba e tij u lëndua tmerrësisht. Adnani ka nevojë për mbrojtje”, deklaroi Giggs pas ndeshjes.

“Ai është i shkëlqyeshëm, lojtar ngazëllues dhe autoritarët duhet ta ruajnë. Edhe lojtarët kundërshtarë duhet të kenë kujdes. Ndërhyrja ishte aq e afër, sa që nisi që nga gjuri, për të përfunduar tek nyja e këmbës”, vazhdoi Giggs.

Januzaj është akuzuar për spekulime të shpeshta këtë sezon, por edhe ndërhyrjet e ashpra ndaj talentit nga Istogu nuk kanë munguar.