Parlamenti Studentor i Universitetit “Haxhi Zeka”, në Pejë ka bërë thirrje për protestë paqësore, e cila do të mbahet të premten.

Sipas njoftimit të studentëve, protesta organizohet si reagim ndaj gjuhës së urrejtjes, fyerjeve dhe kërcënimeve të fundit ndaj ish-komandantit të UÇK-së në Dukagjin, Ramush Haradinaj.

Ata theksojnë se rastet e fundit të deformimit të historisë së Republikës së Kosovës dhe sulmet verbale ndaj figurave të luftës çlirimtare janë të papranueshme dhe cenojnë kujtesën kolektive dhe dinjitetin shoqëror.

Studentët u bëjnë thirrje qytetarëve, profesorëve dhe të rinjve që t’i bashkohen protestës paqësore për të mbrojtur të vërtetën historike, për të kundërshtuar gjuhën e urrejtjes dhe për të reaguar ndaj çdo përpjekjeje për shtrembërimin e historisë së Kosovës.

Protesta pritet të mbahet më 10 prill në qendër të Pejës, në orën 12:00, në sheshin e qytetit të Pejës.