Pamjet janë publikuar në faqen e kësaj partie shqiptare në Bujanoc, dhe pretendohet se personat që kanë provuar ta largojnë flamurin kuq e zi janë pjesëtarë të shërbimeve serbe.

“Alternativa për Ndryshim në Bujanoc, njofton opinionin e gjërë se natën midis 27 dhe 28 nëntorit, pjesëtarë të shërbimeve serbe kanë tentuar ta njollosin flamurin kombëtar shqiptar i cili valvitej në ndërtesën e selisë së këtij subjekti politik, në qendër të qytetit. Ekspedita e këtyre forcave të errta, në dy tentime të ndara, pasi vëzhgon terrenin, përpiqet që me metodat më primitive të njollos simbolin tonë”, thuhet në kumtesën e APN’së.

Ky subjekt politik shqiptar, thotë se gjykojnë ashpër këtë veprim, sic e quajnë ata, primitiv dhe klandestin të pjesëtarëve të forcave serbe të sigurisë dhe kërkon që të njëjtën gjë ta bëjnë edhe faktorët tjerë shqiptarë dhe ata ndërkombëtarë.

“APN kërkon edhe sqarim zyrtar të organeve serbe, se veprimet e tilla të ndërmarra pas mesit të natës a përkojnë me urdhëra të ndonjë institucioni dhe për çfarë qëllimesh mund të shërbejnë ato?!”, thuhet në reagim.

Ndryshe, përdorimi i flamujve të tjerë, përveç atij shtetëror, në Serbi është i ndalur me ligj.