Pas një cikli pa humbje në garë për kualifikim në Kampionatin botëror 2014, Zvicra ka shpresa të mëdha se gjenerata aktuale e futbollistëve e përbërë nga talentë të mëdhenj si Xherdan Shaqiri, do të shkëlqejë në garën e vitit të ardhshëm në Brazil, shkruan AFP.

Selektori gjerman Ottmar Hitzfeld ka paralajmëruar se do të pensionohet pas Botërorit 2014, por me punën e deritashme ka formuar një skuadër të fuqishme që ka filluar të dëshmojë kualitetet e saj.

Më i dalluari është 22-vjeçari Xherdan Shaqiri, i cili debutoi për ekipin senior të Zvicrës më 2010, duke i ndihmuar ekipit helvetik të harrojë tërheqjen e Alex Frei më 2011, edhe pse ai ishte golashënuesi më i mirë dhe idhull i tifozëve. Shaqiri ka shërbyer shkëlqim i cili i mungoi gjatë lojës zvicerane.

Frei, futbollist i Baselit, njësoj si Shaqiri para transferimit në Bayern Munich në verën e vitit të kaluar, u tërhoq nga Kombëtarja së bashku me Marco Strellerin, pas dështimit për kualifikim në Euro 2012.

Mirëpo, Zvicra u këndell shpejt dhe falë Shaqirit dhe yjeve të tjerë shqiptarë si Valon Behrami, Granit Xhaka, Blerim Xhemajli, Admir Mehmedi e Pajtim Kasami, të bashkuar me futbollistë të mirënjohur si Gokhan Inler e Stephan Lichtsteiner, kanë shkëlqyer në fushatën kualifikuese për Kampionatin botëror 2014 duke siguruar pjesëmarrjen në Brazil 2014 dhe statusin e bartësit të grupit.

Për më tepër ekipi është në seri prej 14 ndeshjesh pa humbje – përfshirë miqësoret – dhe nuk do të jetë kundërshtar i lehtë për askënd në Brazil.