Përzgjedhësi i Kroacisë e ka dënuar ashpër sjelljen e tifozëve kroat në ndeshjen kundër Çekisë në kuadër të Kampionatit Evropian të Futbollit (2:2), duke theksuar se ata nuk janë tifozë, por terroristë.

“Të zjarrtit” udhëhiqnin 2:0 deri në minutën e 76-të, para se Milan Shkoda dhe me pas Tomash Necid nga penalltia në minutën e 94-të të barazonin rezultatin, transmeton lajmi.net.

“Këta nuk janë tifozë kroatë, por terroristë. Ajo që me dhemb mua është që shteti nuk dëshiron të përballet me ta. Ky është akt terrorist që e kanë bërë dhjetë prej tyre, jo më shumë. Shpresoj që do të identifikohen dhe të përfundojnë atje ku e kanë vendin”, ka thënë përzgjedhësi kroat, Ante Çaçiq.

UEFA tashmë ka nisur procedurat disiplinore kundër Kroacisë, dhe ka mundësi që edhe të përjashtohen krejtësisht nga Kampionati. /Lajmi.net/