Jose Mourinho ka thënë se do të ishte e padrejtë që David Luiz të veqohet si fajtori kryesor për humbjen e rëndë të Brazilit nga Gjermania, me rezultat 7:1, në gjysmëfinale të Kampionatit botëror.

Menaxheri i Chelseas insistoi se shumë bashkëlojtarë të Luizit ishin po aq fajtorë.

“Nuk mendoj se është e drejtë që të ndajmë një futbollist nga ekipi, sepse komplet ekipi luajti keq”, deklaroi Mourinho në rolin e “Yahoo’s Global Football Ambassador”.

“A bëri David gabime? Po. Njësoj sikurse Dante, Marcelo, Fernandinho dhe komplet skuadra. Andaj nuk mendoj se është e drejtë. Mendoj se njësoj sikurse mua, shumëkujt që është i përfshirë në futboll i vjen keq për atë që ju ndodhi pasi ishin në një moment historik, moment që do të mbetet përgjithmonë i tillë”, u shpreh ai.

Mourinho po ashtu identifikoi problemin kryesor të Brazilit.

“Problemi për ta, në mendimin tim është shpirti që kanë krijuar në Kombëtare, ata ndoshta menduan se ai shpirt do t’ju mjaftonte dhe se do të ishte kualiteti kryesor për të fitua Kampionatin botëror, por nuk ishte ashtu. Ishte i mjaftueshëm për të arritur në gjysmëfinale, por në gjysmëfinale u takuam me një skuadër që ishte më e mirë se ata. Një skuadër që vepron me stabilitet fantastik dhe vetëbesim. Gjithçka shkoi në favor të Gjermanisë”, përfundoi Mourinho.