Kryeministri i Kosovës, Albin Kurti, ka pritur të hënën në takim ambasadorin e Mbretërisë së Bashkuar në Kosovë, Jonathan Hargreaves.

Takimi u zhvillua një ditë pas zgjedhjes së Qeverisë së re, me ambasadorin Hargreaves që e përgëzoi Kurtin për arritjet në drejtim të formimit të institucioneve.

Kurti e ka falënderuar ambasadorin britanik për mbështetjen e vazhdueshme të Mbretërisë së Bashkuar ndaj Kosovës dhe qytetarëve të saj.

Gjatë takimit është diskutuar për rëndësinë e stabilitetit institucional dhe zhvillimet aktuale në vend, si dhe për marrëdhëniet bilaterale ndërmjet Kosovës dhe Mbretërisë së Bashkuar.

Në fokus ka qenë edhe thellimi i bashkëpunimit në fusha të ndryshme, përfshirë ekonominë, digjitalizimin dhe teknologjinë e informacionit, mbrojtjen, energjinë dhe luftimin e dezinformimit.

Takimi u zhvillua në kuadër të angazhimeve për forcimin e bashkëpunimit ndërmjet Kosovës dhe Mbretërisë së Bashkuar. /Lajmi.net/