Akordi ndërmjet kryetarit të Lëvizjes Vetëvendosje, Albin Kurti, dhe atij të Lidhjes Demokratike të Kosovës, Lumir Abdixhiku, për të propozuar profesorin universitar dhe ish-gjyqtarin e Gjykatës Kushtetuese, Bekim Sejdiu, për President të Republikës së Kosovës, është pritur me valë skepticizmi nga opozita, duke përfshirë edhe figura nga vetë radhët e LDK-së.

Kryetari i LDK-së, Lumir Abdixhiku, e mbrojti figurën e Sejdiut duke vënë në pah bagazhin e tij në drejtësi, diplomaci dhe botën akademike, duke kujtuar përvojën e tij si ambasador në Turqi, konsull i përgjithshëm në Nju Jork dhe anëtar i Gjykatës Kushtetuese (2015–2021). Nga ana e tij, Sejdiu deklaroi se e ka pranuar këtë përgjegjësi për t’i shërbyer shtetit.

Megjithatë, emri i akorduar mes partive do të ballafaqohet menjëherë me filtrin rigoroz të arkitekturës kushtetuese.

Rregullat për zgjedhjen e kreut të shtetit kërkojnë konsensus të gjerë: Kushtetuta kërkon dy të tretat e të gjithë 120 deputetëve, pra 80 vota në dy rundet e para; vetëm në rundin e tretë mjaftojnë 61 vota, me kushtin e panegociueshëm që në procesin e votimit të marrin pjesë të paktën 80 deputetë.

Goditja e parë dhe më domethënëse ndaj këtij kompromisi erdhi nga vetë brendësia e LDK-së, transmeton nacionale. Ish-kryeministri dhe deputeti Avdullah Hoti deklaroi publikisht dhe prerazi refuzimin e tij për të mbështetur këtë kandidaturë.

Në reagimin e tij, Hoti thase vendimi i tij buron nga parimi institucional dhe jo nga animoziteti personal, duke vlerësuar se Sejdiu nuk përfaqëson një figurë unifikuese dhe as nuk reflekton vlerat dhe interesat e elektoratit të LDK-së:

“Nuk e përkrah këtë kandidaturë për President të Republikës së Kosovës, jo për arsye personale, por për një parim politik dhe institucional. Presidenti i Republikës duhet të jetë figurë unifikuese, e cila ndërton konsensus përtej interesave partiake dhe përfaqëson interesin e përgjithshëm të qytetarëve. Në vlerësimin tim, kjo kandidaturë nuk e përmbush këtë kriter,” deklaroi ndër të tjera Hoti, duke shtuar se mënyra e imponuar e kësaj zgjidhjeje po dëmton identitetin politik të LDK-së.

Refuzim kategorik ka shfaqur edhe Aleanca për Ardhmërinë e Kosovës. Sekretari i Përgjithshëm i kësaj partie, Avni Arifi, në një deklaratë për Klan Kosova, bëri të qartë se subjekti i tij refuzon të bëhet pjesë e marrëveshjeve dypalëshe:

“Ne nuk jemi pjesë e projektit Kurti-Abdixhiku. U takon atyre të sqarojnë. Qëndrimi ynë është ai që kemi pasur para tre muajsh. Për ne asgjë nuk ka ndryshuar,”theksoi Arifi.

Po ashtu, zyrtari i AAK-së, Burim Ramadani, e cilësoi marrëveshjen si “lojë me shtetin” për ndarje postesh, duke vënë në dyshim seriozitetin e saj:

“Pse s’po e thirrin sot seancën e Kuvendit? Mos të ishte lojë me shtetin kjo marrëveshja dypartiake, Kuvendi do të konstituohej menjëherë sot. Tash marrëveshjen për ndarje të posteve e kanë.”

Ndërsa nga Partia Demokratike e Kosovës u bë e ditur se do të mblidhet Kryesia, ku mes diskutimeve do të jetë edhe çështja e Presidentit.