Nga burime brenda Zyrës së BE-së në Kosovë, e cila sikurse shumica e ambasadave paguan kompani profesionale për t’i monitoruar mediat, Indeksonline ka siguruar raportin tremujor të këtij viti, prej 1 janarit deri më 31 mars 2015, që katër televizionet me frekuenca nacionale, RTK, KTV, RTV21 dhe Klan Kosova ua kanë dhënë subjekteve politike. Këtë raport e marrin në mënyrë të rregullt edhe shumica e ambasadave të huaja në Kosovë, të cilat interesohen për programin e televizioneve dhe mbulimin e aktiviteteve politike prej tyre.

Radiotelevizioni i Kosovës (RTK) që është i kritikuar për anime politike, gjatë periudhës janar-mars, PDK-së i kishte pasqyruar medialisht 28 aktivitete me tematikë politike, LDK-së 39 aktivitete, Vetëvendosjes 50 aktivitete, AAK’së 43 aktivitete, Nismës 17 aktivitete dhe Listës Serbe 6 aktivitete.

Në Kohavision (KTV), gjatë kësaj periudhe tremujore, PDK’së i ishin pasqyruar 44 aktivitete politike, LDK-së 45 aktivitete politike, Vetëvendosjes 69 aktivitete politike, AAK’së 33 aktivitete politike, Nismës 13 aktivitete politike dhe Listës Serbe, njëjtë si në RTK, 6 aktivitete politike.

Ndërsa, në Radiotelevizionin 21 (RTV21), PDK-së i ishin pasqyruar 39 aktivitete politike, LDK-së 63 aktivitete politike, Vetëvendosjes 83 aktivitete politike, AAK-së 43 aktivitete politike, Nismës 21 aktivitete politike dhe Listës Serbe 12 aktivitete politike.

E në Klan Kosova, PDK-së i janë pasqyruar 45 aktivitete me tematikë politike, LDK-së 65 aktivitete politike, Vetëvendosjes 95 aktivitete politike, AAK-së 48 aktivitete politike, Nismës 13 aktivitete politike dhe Listës Serbe 3 aktivitete politike.

Sipas këtyre të dhënave që i posedojnë edhe shumica e televizioneve në Kosovë, gjatë tremujorit të kaluar Lëvizjes Vetëvendosje i është dhënë më së shumti hapësirë mediale me 297 herë në katër televizionet kryesore të vendit, pas saj vjen LDK-ja me 212 herë, pastaj AAK-ja me 167 herë, PDK-ja me 156 herë, Nisma me 64 herë dhe Lista Serbe me 27 herë.