Koalicioni opozitar LDK-AAK-Nisma ka shtruar sot iftar për minoritetet joserbe. Pas kësaj, i nominuari për kryeministër, Ramush Haradinaj ka thënë se ka përafruar qëndrimet me minoritetet,  mirëpo ai nuk ka marrë garanci se do të ketë mbështetjen e tyre të pakusht.

“Kemi provuar edhe më herët të takohemi me minoritetet dhe kam kuptuar që të gjithë janë me Ramazan. Kam vendosë me iu shtru një iftar. Përveç që kemi darkuar bashkë, kemi folur edhe për shqetësimet tona në lidhje me shtetin, njëkohësisht edhe për formimin e qeverisë së re dhe koalicionit”.

“Nuk kemi marrë garanci që do të kemi mbështetje të pakusht, mirëpo qëndrimet i kemi mjaft të përafërta”, ka thënë ai.

Ndërkaq , duke folur për Vetëvendosjen e Albin Kurtit, edhe për këtë parti, Haradinaj ka thënë se i kanë përafruar qëndrimet.

“I kemi përafruar shumë qëndrimet. Nuk po mundem të flas me garanci se do të kemi mbështetje të pakusht prej Vetëvendosjes, mirëpo qëndrimet i kemi shumë të përafërta dhe bisedimet po zhvillohen në një frymë mjaft pozitive”.

Haradinaj ka thënë se nesër do të takohen sërish në selinë e Vetëvendosjes. Ndërkaq, treshja opozitare po vazhdon takimin edhe pas iftarit, derisa të ftuarit e tyre, minoritetet joserbe, mbas iftarit janë larguar.