Zyrtari i LDK-së dhe ish-këshilltari presidencial, Muhamet Hamiti, ka drejtuar kritika të ashpra ndaj kryeministrit në detyrë, Albin Kurti, duke e akuzuar për shkelje të Kushtetutës dhe për sjellje autokratike në qeverisje.

Në një postim, Hamiti ka thënë se Kurti ka kërkuar “500 mijë vota pa ofruar program”, dhe se “as 7 muaj pas zgjedhjeve nacionale të shkurtit, kurrë program s’ka përmendur”, transmeton lajmi.net.

“Punë dhe drejtësi ka pasë premtuar më 2021. Bëri punësime nepotiste dhe partiake, bëri korrupsion masiv qeveritar, i shkeli pamëshirshëm Kushtetutën dhe ligjet e Kosovës”, ka deklaruar Hamiti, duke e cilësuar Kurtin si një “demagog populist”.

Ai ka akuzuar liderin e Vetëvendosjes se me votat e fituara në zgjedhjet e fundit, ka bllokuar funksionimin kushtetues të institucioneve. “Nuk ka Kuvend të konstituuar, nuk ka Qeveri me mandat të plotë. Po sundon lideri i VV-së në kundërshtim me normat demokratike”, ka shtuar ai, duke theksuar se Kurti dhe “sejmenët e tij partiakë e medialë” vazhdojnë të fajësojnë qeveritë e kaluara për dështimet aktuale, pa marrë përgjegjësi për situatën në vend./lajmi.net/