Erëra të forta parashihet të godasin sot Kosovën, IHMK paralajmëron qytetarët për rrezikun

Moti në Kosovë sot pritet të karakterizohet nga erëra të forta, vranësira dhe reshje të lehta shiu. Instituti Hidrometeorologjik i Kosovës (IHMK) ka paralajmëruar se e enjtja, 19 nëntor 2026, do të karakterizohet nga paqëndrueshmëri e theksuar atmosferike, veçanërisht nga erërat e forta që pritet të përfshijnë vendin. Sipas IHMK-së, temperaturat maksimale do të lëvizin…

Lajme

19/11/2026 08:49

Moti në Kosovë sot pritet të karakterizohet nga erëra të forta, vranësira dhe reshje të lehta shiu.

Instituti Hidrometeorologjik i Kosovës (IHMK) ka paralajmëruar se e enjtja, 19 nëntor 2026, do të karakterizohet nga paqëndrueshmëri e theksuar atmosferike, veçanërisht nga erërat e forta që pritet të përfshijnë vendin.

Sipas IHMK-së, temperaturat maksimale do të lëvizin nga 15 deri në 18 gradë Celsius, vlera relativisht të larta për këtë periudhë të nëntorit.

Era do të fryjë nga drejtimi jugor dhe jugperëndimor, me shpejtësi prej 30 deri në 45 kilometra në orë, ndërsa gjatë rafaleve mund të arrijë shpejtësi edhe më të larta.

Intensiteti më i madh i erës parashihet nga mesdita deri në orët e mbrëmjes.

Gjatë ditës priten edhe reshje të lehta shiu, të cilat do të jenë të herëpashershme. Sasia e reshjeve lokalisht mund të arrijë rreth 1 milimetër brenda 3 orëve.

Presioni atmosferik pritet të zbresë deri në rreth 999 hektopaskalë, ndërsa në orët e vona parashihet kalimi i një fronti atmosferik që do të ndikojë në ndryshimin e drejtimit të erës.

Për shkak të kushteve të motit, IHMK u ka bërë thirrje qytetarëve të tregojnë kujdes të shtuar, veçanërisht në hapësirat e hapura.

Instituti rekomandon sigurimin e objekteve të lehta në ballkone dhe oborre, ndërsa vëmendje e veçantë duhet t’u kushtohet tabelave reklamuese dhe skelave të ndërtimit.

Drejtuesit e automjeteve këshillohen të jenë të kujdesshëm gjatë qarkullimit rrugor, sidomos në zonat e ekspozuara ndaj erërave të forta.

IHMK u ka rekomanduar qytetarëve të përcjellin njoftimet e radhës për ndryshimet e mundshme të kushteve atmosferike.