Edi Rama i cilëson shqiptarët si dembelë

11:23 | 28 Prill 2016

Kryeministri i Shqipërisë, Edi Rama vazhdon të fajësojë shqiptarët për nivelin e papunësisë. Me premtimin e pambajtur për 300 mijë vende të reja pune, kryeministri ishte në Panairin e Punës në Tiranë, ku foli për një dembelizëm masiv të kultivuar nga qeverisja e kaluar.

“Në gjithë vitet që pararendën ardhjen tonë në qeveri, është sponsorizuar ‘dembelizmi masiv’. Është incentivuar ‘dembelizmi masiv’ dhe mungesa e një strukture dhe infrastrukture. Mungesa e një mësimi profesional ka sjellë një rënie katastrofike të cilësisë dhe krahut të punës dhe një shkëputje shumë të madhe mes kërkesës dhe ofertës, mes aasaj çka biznesi ka nevojë, dhe asaj çka tregu i punëkërkuesve ofron”.

Por në perceptimin e kryeministrisë, shqiptarët nuk janë vetëm dembela. Shumica e atyre që kërkojnë punë janë edhe të pashkolluar, tha Rama. “55% e punëkërkuesve thonë se nuk kanë profesion dhe janë me shkollë 9 vjeçare” u shpreh kryeministri, që vuri në dukje se Panairi i Punës i hapur në Tiranë, ofron 8 mijë vende të reja punë. Para Ramës, kishte folur Blendi Klosi, i cili në fjalim përsëriti disa herë slloganin “Shqipëria ka punë, por duhen profesionistë”.