Lënia anash e Iker Casillasit në dy sezonet e fundit ka bërë që të diskutohet shumë në shtëpinë e Real Madridit, ndërsa kështu mund të jetë edhe deri në fund të këtij sezoni.

Dhe, durimit të tifozëve të ‘Los Blancos’ duket se i ka ardhur fundi, ngase ata e duan heroin e tyre në portë, duke e preferuar atë para portierit Diego Lopez, i cili po mbron rregullisht këtë sezon, por edhe atë të shkuarin.

“Tifozët e Duan Casillasin”, është titulli i së përditshmes spanjolle, As, e cila në versionin e saj online e ka bërë një sondazh rreth paraqitjeve të Lopez dhe preferencën e tifozëve për portierin e parë të Merengues.

Dhe, përgjigja e tifozëve ishte e qartë: 85% e tyr  kërkojnë njëzëri rikthimin e Casillas në portë, ndërsa pjesa e tjetër vazhdojnë ta mbështesin ish portierin e Sevillës, i cili e mori pozitën e titullarit nga janari i vitit të kaluar, pas lëndimit që e kishte pësuar Casillas.

Ky i fundit po mbron në ndeshjet e Kupës së Spanjës dhe në Ligën e Kampionëve, por kjo është e pamjaftueshme për të, pasi e ka konsideruar disa herë largimin nga Santiago Bernabeu.