Paqe mes Pep Guardiolës dhe Tito Vilanovës. Dy trajnerët spanjollë, dikur shokë të ngushtë, ishin larguar, kur ky i fundit ia zuri vendin në postin e trajnerit të Barcelonës, të cilin megjithatë e lëshoi në fund të sezonit të shkuar për shkak të betejës me kancerin.

Vilanova kohë më parë kishte deklaruar se priste më shumë nga Guardiola me të cilin kishte kontaktuar vetëm disa herë pas ‘ndarjes’ nga Barcelona, e sidomos gjatë periudhës së vështirë kur ishte në betejë me sëmundjen e rëndë.

Por, sipas të përditshmes katalan Mundo Deportivo, ata janë takuar mes vete në shtëpinë e Guardiolës dhe kanë biseduar gjatë.

Guardiola me aeroplan privat udhëtoi nga Gjermania për në Barcelonë në mënyrë që të takohet me Vilanovën. Dhe, thuhet se qetësia është kthyer mes tyre.