Presidentja e Komisionit Evropian, Ursula von der Leyen, do të nisë nesër turin ballkanik dhe ndalesa e saj e parë do të jetë Tirana.

Në kuadër të vizitës, Von der Leyen, do të zhvillojë takime me presidentin Bajram Begaj dhe kryeministrin Edi Rama.

Ndërsa më 1 tetor, ajo do të nisë me takimet në Kosovë me presidenten në detyrë, Albulena Haxhiun dhe kryeministrin Albin Kurti.

Po të njëjtën ditë, kreu i KE-së do të vijojë edhe në Malin e Zi me presidentin Jakov Millatoviq dhe kryeministrin Millojko Spajiq.

Përmbyllja e turneut do të bëhet ditën e premte, në Maqedoninë e Veriut, ku do të takohen me presidenten Gordana Siljanovska-Davkova dhe kryeministrin Hristijan Mickoski.

Në këtë turne, Von der Leyen nuk do të vizitojë Serbinë dhe Bosnjë e Hercegovinën. Sipas njoftimit, këto dy vende janë lënë jashtë itinerarit për shkak të zgjedhjeve të ardhshme që do të zhvillohen atje.

Presidentja e KE-së vjen edhe me një plan për një udhërrëfyes të posaçëm për Shqipërinë, Malin e Zi, Moldavinë dhe Ukrainën që do t’u ndihmojë atyre në rrugën e anëtarësimit në Bashkimin Europian.

Plani parashikon reforma prioritare, afate orientuese dhe objektiva për përfundimin e fazave të negociatave. Në këmbim, edhe vendet anëtare të BE-së do të kenë angazhime për të avancuar procesin. Vendimet kyçe kërkojnë miratimin unanim të vendeve anëtare.