Instagram ka hequr nga platforma një fotografi të gazetarit të Lajmi.net, Selim Miftari, duke e cilësuar atë si përmbajtje që bie ndesh me rregullat e platformës për “organizatat dhe individët e rrezikshëm”.

Sipas njoftimit të shfaqur nga Instagram, fotografia është larguar pasi, sipas platformës, “mund të përmbajë simbole, glorifikim ose mbështetje të njerëzve dhe organizatave që ne i përkufizojmë si të rrezikshme”.

Në fotografinë e publikuar nga gazetari shihet Miftari duke mbajtur një bluzë me mbishkrimin “UÇK”. Krahas fotografisë ishte vendosur përshkrimi “KOSOVA PO PRET UÇK❤️”.

Vendimi i Instagramit e ka klasifikuar kështu simbolin dhe përmbajtjen që lidhet me UÇK-në në kategorinë e përmbajtjeve që platforma i konsideron të ndërlidhura me “organizata të rrezikshme”.

Në njoftimin e dërguar gazetarit, Instagram i ofron mundësinë për të kërkuar rishikimin e vendimit. Sipas njoftimit, Miftarit i kanë mbetur 179 ditë për të paraqitur kërkesë për rishqyrtim./Lajmi.net/