Policia e Kosovës ka paralajmëruar qytetarët për një seri mesazhesh mashtruese dhe dokumentesh të falsifikuara që po qarkullojnë, në të cilat në mënyrë të paautorizuar përdoren emri, logot, vulat dhe nënshkrimet e institucioneve të Kosovës.

Përmes një njoftimi, Policia ka bërë të qartë se dokumenti i publikuar nuk është njoftim zyrtar i saj, duke u bërë thirrje qytetarëve që të mos u përgjigjen kërkesave të tilla dhe të mos ndërmarrin veprime bazuar në përmbajtjen e tyre, transmeton lajmi.net.

Qytetarët këshillohen të mos ndajnë të dhëna personale, dokumente apo informacione përmes adresave të dyshimta dhe të shmangin klikimin në linqe të panjohura.

Policia ka paralajmëruar gjithashtu që të mos hapen faqe që kërkojnë pagesa përmes SMS-ve dhe të mos jepen të dhëna bankare apo personale.

Në rast se qytetarët pranojnë mesazhe të tilla, Policia rekomandon që ato të fshihen dhe të raportohen te autoritetet përkatëse. Nëse dikush ka ndarë të dhëna bankare, duhet të kontaktojë menjëherë bankën.

Sipas Policisë, për raportimin e rasteve qytetarët mund të përdorin aplikacionin “Lajmëro Policinë” ose të telefonojnë në numrin 192.

Ndërkohë, Policia e Kosovës ka bërë të ditur se po ndërmerr veprimet e nevojshme për trajtimin e rastit dhe identifikimin e personave përgjegjës, duke kërkuar që qytetarët për informacionet zyrtare t’u referohen vetëm kanaleve zyrtare të institucioneve.

Postimi i plotë;