Tregu i kriptove ka shënuar rritje në muajin prill, pavarësisht tensioneve gjeopolitike dhe pasigurisë së vazhdueshme në tregjet globale. Sipas raportit mujor të Binance, vlera totale e tregut të kriptove u rrit me më shumë se 8%, duke arritur në 2.6 trilionë dollarë.

Një nga faktorët që ndihmoi tregun ishte armëpushimi i përkohshëm mes Shteteve të Bashkuara dhe Iranit. Bitcoin u forcua më tej si rezultat i një short squeeze, pasi investitorët që kishin vënë bast për rënie të çmimit u detyruan të mbyllnin pozicionet e tyre, duke e çuar çmimin pranë nivelit prej 80,000 dollarësh.

Megjithatë, rreziqet nuk janë zhdukur. Lufta e zgjatur vazhdon të ushqejë frikën nga stagflacioni, një situatë ku ekonomia ngadalësohet ndërsa çmimet vazhdojnë të rriten. Për këtë arsye, në periudhën e ardhshme tregu pritet të ndjekë me kujdes të dhënat për inflacionin, sidomos CPI dhe PCE, si dhe lëvizjet e Rezervës Federale pas mbledhjeve të FOMC-së. Raporti përmend gjithashtu si kujdes afatshkurtër modelin e rënieve pas FOMC-së dhe ftohjen e tregut të aksioneve.

Një nga paradokset kryesore të prillit ishte se tregjet u rritën edhe pse Ngushtica e Hormuzit nuk u rihap, ndërsa Brent mbylli muajin mbi 110 dollarë. Pavarësisht kësaj, aksionet arritën nivele rekord dhe Bitcoin shënoi rezultatin më të mirë mujor në 12 muaj. Kjo sugjeron se investitorët nisën ta shohin luftën më shumë si pjesë të sfondit të përgjithshëm të tregut, sesa si një ngjarje që automatikisht ndal rritjen.

Sektorët nuk lëvizën njësoj. Gjysmëpërçuesit ishin përjashtimi më i madh, me indeksin SOXX që shënoi muajin më të mirë në histori, me rritje prej 37%, i mbështetur nga kërkesa për infrastrukturë të inteligjencës artificiale, e cila u tregua rezistente ndaj tensioneve gjeopolitike. Në të njëjtën kohë, konfirmimi i Kevin Warsh në Senat dhe fundi i pritshëm i dot plot-it po shtojnë një regjim të ri pasigurie, që mund ta bëjë narrativën e Bitcoin-it si aset i pavarur nga sovraniteti shtetëror më të rëndësishme.

Por krahas rritjes së tregut, raporti nxjerr në pah edhe anën më të brishtë të industrisë. Gjatë prillit, humbjet nga sulmet dhe keqpërdorimet në kripto arritën në 635.24 milionë dollarë, ose 3.8 herë më shumë se totali i gjithë tremujorit të parë të vitit 2026. Edhe frekuenca e incidenteve ishte më e lartë se vitin e kaluar.

Rasti i KelpDAO tregoi se sa shpejt stresi mund të përhapet në shtresat e kolateralit, huadhënies, likuiditetit dhe levës në DeFi. Nga momenti i sulmit deri në fund të muajit, TVL ra nga 99.5 miliardë dollarë në 82.7 miliardë dollarë. Kjo ka rikthyer vëmendjen te mënyra se si çmohet rreziku në DeFi dhe te nevoja që mekanizmat e reagimit, mbrojtjet rezervë, sigurimi dhe kontrollet në nivel protokolli të zhvillohen më tej, sidomos ndërsa më shumë kapital po lëviz on-chain.

Në të njëjtën kohë, tregu po sheh edhe produkte të reja. Në fund të prillit u rrit interesimi për pre-IPO perps, të prezantuara nga Ventuals, të cilat u japin përdoruesve ekspozim ndaj kompanive private si SpaceX, OpenAI dhe Anthropic para një daljeje të mundshme në bursë. Edhe pse ky segment është ende në fazë të hershme krahasuar me TradFi perps, që kanë rreth 8 miliardë dollarë volum ditor, infrastruktura on-chain po hap për herë të parë qasje retail në tregjet private.

Në tërësi, raporti tregon një treg që po rimëkëmbet, por jo pa tensione. Kripto ka treguar aftësi për t’u rritur edhe në një mjedis të pasigurt gjeopolitik, ndërsa Bitcoin, ETF-të, produktet e reja dhe DeFi po tregojnë drejtime të reja zhvillimi. Megjithatë, humbjet nga sulmet, rreziqet makro dhe pasiguria rregullatore mbeten faktorë që tregu nuk mund t’i injorojë.