Ministri i Bujqësisë, Pylltarisë dhe Zhvillimit Rural, Armend Muja ka pritur në takim Ambasadorin e Francës në Kosovë, Olivier Guérot, ku është diskutuar për thellimin e bashkëpunimit në sektorin e bujqësisë.

Në njoftim të kësaj ministrie thuhet se gjatë takimit palët kanë shqyrtuar mundësitë për krijimin e marrëveshjeve të reja me kompani franceze, me fokus të veçantë në zhvillimin e bujqësisë dhe avancimin e sistemit të ujitjes në Kosovë.

Ministri Muja theksoi se rritja e sigurisë ushqimore mbetet prioritet i institucioneve, duke theksuar rëndësinë e investimeve dhe bashkëpunimit ndërkombëtar në këtë drejtim. Kjo qasje u mbështet edhe nga ambasadori Guérot, i cili e vlerësoi si një iniciativë të rëndësishme për zhvillimin e qëndrueshëm të sektorit.

Po ashtu, në takim u diskutua edhe për pjesëmarrjen e ministrit në Panairin Ndërkombëtar të Bujqësisë në Paris, si një mundësi për forcimin e lidhjeve ekonomike dhe krijimin e partneriteteve të reja.

Në përmbyllje, ambasadori Guérot e uroi ministrin Muja për detyrën e re, duke i dëshiruar suksese në angazhimet e tij për zhvillimin e mëtejshëm të bujqësisë në Kosovë.