Ish-deputeti i LDK-së, Adem Salihaj, ka komentuar për çështjen e zgjedhjes së presidentit të Kosovës dhe mundësinë e konsensusit në këtë drejtim.

Ai tha se problemi nuk është vetëm tek numrat, por në arritjen e një konsensusi të plotë që do të përfshinte të gjithë faktorët politikë.

Salihaj theksoi se për momentin, presidentja aktuale, Vjosa Osmani, nuk po konsiderohet për një konsensus të gjerë, ndërsa mundësia që emri i ardhshëm të jetë nga familja Jashari është e mundshme, por ende nuk është i sigurt se cili do të jetë ai.

Në lidhje me kandidaturat për president, Salihaj theksoi se është e rëndësishme që presidenti i ri të ketë një mbështetje të gjerë, përfshirë atë kombëtare dhe të ketë aftësitë e duhura për këtë post.

Ai gjithashtu shtoi se në rast se dikush nga familja Jashari nominohet për president, mund të ketë mbështetje nga PDK-ja dhe ndoshta edhe nga LDK-ja, duke u siguruar kështu numrat e nevojshëm për zgjedhjen e tij në Kuvend.

“Unë mendoj që problem është te numrat, nëse ne flasim për konsensus të zgjedhjes së presidentit, atëherë konsensusi nënkupton pajtimin e të gjithëve dhe për ta arritur një pajtim të të gjithëve është pak e vështirë. Presidentja aktuale, Vjosa Osmani tash për tash nuk flitet për një lloj konsensusi, dhe emri tjetër mendoj plotësisht që do të jetë nga familja Jashari, por cili emër do të jetë nuk jam i sigurt, pra në këtë moment. Ne duhet të kemi parasysh dy aspekte për çështjen e presidentit, një aspekt është përcaktimi i qartë kombëtar i personit që do të jetë president dhe duhet të jetë aftësia e personit që të jetë president”

“Nëse dikush nga familja Jashari nominohet për president, nëse ka votë nga PDK mendoj që do të ketë votë edhe nga LDK, LDK-ja  është penalizuar shumë me vetë faktin se nuk ka bashkëpunuar 9 muajt e kaluar para zgjedhjeve të dhjetorit. Mendoj se për Vjosa Osmanin mund të ketë një dakordim nga LDK ose nga shumica e LDK-së, ndërsa nga PDK nëse ka një dakordim nga kjo parti për një kandidat nga familja Jashari, është e sigurt zgjedhja e tij në Kuvend sepse ka vota të mjaftueshme që të zgjedhet”, ka deklaruar ai në Tëvë1.