Ndeshja kryesore e këtij edicioni në Superligën e Kosovës në futbolli do të zhvillohet sot mes Dritës dhe Ballkanit.

Stadiumi me bari sintetik në Gjilan është vendtakimi i dy skuadrave të vetme që janë në garë të ngushtë për titull të kampionit, shkruan lajmi.net.

Drita është lidere me 66 pikë, tri më pak ka Ballkani në pozitën e dytë tabelore.

Fitorja për gjilanasit do të ishte “punë e kryer” sa i përket titullit, ndërkaq për mysafirët një “rikthim” në garë.

Forma e dy skuadrave në pesë ballafaqimet e fundit në Superligë

Si Ballkani, ashtu edhe Drita nuk dinë për humbje në pesë ndeshjet e fundit të luajtura në elitën e futbollit kosovar.

Tre herë kampionët e Kosovës kanë tri fitore radhazi dhe dy barazime, ndërkohë “portokallezinjtë” kanë dy fitore dhe tri barazime, duke treguar një formë të luhatshme.

Drita ka pranuar vetëm një gol në pesë takimet e fundit dhe ka shënuar shtatë herë.

Në anën tjetër, skuadra e drejtuar nga trajneri Ilir Daja ka pranuar gjashtë gola dhe ka realizuar plot 12 herë.

Drita dhe Ballkani janë ndeshur 18 herë në histori, bilanci në anën e suharekasve

Kampionët në fuqi kanë shtatë fitore, krahas gjashtë triumfeve të Dritës. Dy ekipet janë ndarë pesë herë me barazim.

Deri në fund të edicionit, pa llogaritur këtë takim, kanë mbetur edhe katër xhiro për t’u zhvilluar.

Derbi ndërmjet Dritës dhe Ballkanit do të zhvillohet me fillim nga ora 15:00./Lajmi.net/