Komuna ka bërë të ditur se propozim buxheti është përpiluar duke u bazuar në kërkesat dhe nevojat e qytetarëve, si rezultat i diskutimit publik. 

Në një njoftim për media, dërguar nga Komuna, thuhet se nënkryetari i Komunës së Prishtinës, Dardan Sejdiu, tha se ky buxhet është planifikuar pasi që është analizuar gjendja në terren. 

“Mund të them se shumë nga drejtorët e Komunës së Prishtinës që kanë punuar në këtë buxhet, kanë qenë në terren. Për shembull, Drejtori i Infrastrukturës, Hysen Durmishi, nuk ka lagje dhe fshat në Komunën e Prishtinës që nuk e ka vizituar, duke i diskutuar nevojat dhe problemet e banorëve në mënyrë që të shihet mundësia e futjes së tyre planifikimin buxhetor. Qëllimi ynë ka qenë që qytetari të bëhet çdo ditë e më shumë pjesëmarrës aktiv në ndërtimin e buxhetit. Synimi ynë final është që buxheti të jetë i ndërtuar me pjesëmarrje, ku qytetarët janë ata që na tregojnë brengat e tyre dhe ne reflektojmë në buxhet, në bazë të prioriteteve që ata i reflektojnë”, tha Sejdiu. 

Drejtori i Financave në Komunën e Prishtinës, Visar Berisha, përmendi projektet kryesore kapitale që janë parashikuar për të tre vitet e ardhshme. 

Ka përmendur se si kanë planifikuar rreth 25 milionë euro investime kapitale për vitin 2015. 

Në sektorin e infrastrukturës thotë se kanë parashikuar rreth 5 milionë euro për rrugët urbane dhe rurale, që i lejon diskrecion Drejtorisë së Infrastrukturës që të ndërhyjë kudo që paraqitet nevoja. 

Tek drejtoria e Shërbimeve Publike, kanë ndarë një shumë të konsiderueshme të buxhetit për sipërfaqet e gjelbra, për sinjalizim, ndriçim publik, mirëmbajtje dhe pastrim të rrugëve, si dhe një shumë e konsiderueshme për përfundimin e projektit të kogjenerimit, ngrohjes me avull. 

Po ashtu, janë ndarë mjete edhe për ndërtimin e fabrikës së ujit në Shkabaj që Komuna e Prishtinës e bashkëfinancon me një shumë totale prej 4 milionë eurove në përgjithësi. 

Gjithashtu, kanë parashikuar vazhdimin e digjitalizimit të shërbimeve që kemi filluar me dokumentet e ofiqarisë që merren “online”, ndërsa parashihet që të digjitalizohen edhe shërbime të tjera. 

Në kuadër të sektorit të Kulturës, Rinisë dhe Sportit, ndër të tjera, është planifikuar ndërtimi i pishinës së mbyllur olimpike. Gjatë vitit të ardhshëm do të bëhet edhe një studim i fizibilitetit për Pallatin e Rinisë. 

Gjatë 2014 kanë thënë se kanë qenë diku rreth 800 mijë euro subvencione për bujqësi, ndërsa që nga viti i ardhshëm ky buxhet rritet për 250 milionë euro. 

“Në kuadër të arsimit është parashikuar ndërtimi i disa shkollave, siç janë ato në lagjen “Kalabria”, “Veternik”, “Mati 1”, “Sofalia” si dhe ndërtimi i disa çerdheve të reja dhe sallave sportive. Po ashtu, është i planifikuar edhe ndërtimi i “Muzeut Shkencor për Fëmijë. Vitin në vijim do të vazhdohet edhe me hartimin e planeve rregulluese të hollësishme, të hartave zonale të Komunës. Edhe në sektorin e shëndetësisë është parashikuar ndërtimi i disa objekteve të qendrave familjare, në lagjen “Veternik” dhe lagjen “Tophane”, – theksoi Visar Berisha, duke shtuar se këto janë disa nga projektet kapitale të planifikuara në buxhetin e vitit 2015”, ka thënë Berisha. 

Nënkryetari Dardan Sejdiu tha se gjatë vitit të ardhshëm është planifikuar edhe një riorganizim të përgjithshëm të punës në Komunën e Prishtinës, me një strukturë të re organizative e cila është më e përshtatshme për zhvillimin dhe menaxhimin e projekteve në kryeqytet. 

“Vitin e ardhshëm do ta kemi Drejtorinë e Zhvillimit të Qëndrueshëm dhe të Planifikimit Hapësinor që planifikon zhvillimin strategjik të Prishtinës i cili nuk do të shihet vetëm nga aspekti urban, por edhe nga aspekti ekonomik, social dhe kulturor duke na krijuar mundësinë që të kemi politika adekuate që do të reflektojnë në buxhet që përshtatet me logjikën që jemi duke u munduar ta vëmë si standard në Komunën e Prishtinës që strategjia imponon kornizat në planifikimet afatmesme buxhetore, prej së cilës do të rrjedhin edhe buxhetet vjetore”, theksoi Sejdiu. 

Draftbuxheti i Komunës së Prishtinës do t’i dorëzohet më datë 1 shtator Kuvendit Komunal të Prishtinës, i cili obligohet ligjërisht që të organizojë sërish dëgjime publike me qytetarë, ndërsa me datë 30 shtator, Komuna e Prishtinës planifikimin buxhetor e dorëzon në Qeverinë e Kosovës, rrjedhimisht në Parlamentin e Kosovës.