Kanë qenë 84 anëtarë të LDK-së që i kanë thënë po koalicionit me AAK-në dhe Nisma-n, ndërsa 5 kanë abstenuar. 

Në këtë mbledhje gjithashtu është vendosur që kryetari i partisë Isa Mustafa të nominohet për kryetar të Kuvendit të Kosovës. 

Lajmi.net, merr vesh se njëri prej atyre që ka abstenuar, duke mos i thënë as po aj jo këtij koalicioni, është deputeti Arben Gashi, i cili edhe më parë është deklaruar kundër që posti i kryeministrit t’i jepet AAK-së.

Ndërkaq pas mbledhjet, anëtari i kryesisë së LDK-së, Ismet Beqiri, ka thënë se, pavarësisht abstenimeve, pas vendimit me shumicë votash të Këshillit të Përgjithshëm, të gjithë deputetët e LDK-së në Kuvend, do të votojnë pro koalicionit qeveritar.

Ai tutje ka shtuar se në bisedat me Vetëvendosjen, kanë arritur t’i përafrojnë qëndrimet, dhe shumë shpejtë presin që të arrijnë një marrëveshje.

“Ne sot kishim mbledhjen  e radhës të Këshillit të Përgjithshëm të Lidhjes Demokratike të Kosovës, ku në rend dite ishte marrëveshja  realizuar mes Lidhjes Demokratike të Kosovës , Aleancës për Ardhmërinë e Kosovës dhe Nismës për Kosovën , e nënshkruar me 10 qershor, dhe sot Këshilli i Përgjithshëm i LDK-së, e ka përkrah me 84 vota pro 5 abstenime dhe asnjë votë kundër”.

“Ne edhe në Këshill të Përgjithshme kemi vendosur që kandidat për kryetarë të Parlamentit të Republikës së Kosovës të jetë Isa Mustafa dhe edhe kjo është përkrah me asnjë votë kundër”.

“Të 30 deputetët e Lidhjes Demokratike të Kosovës e kanë nënshkruar formimin e Grupit Parlamentar LDK, AAK, Nisma, në mesin e tyre edhe Armend Zemaj dhe Arben Gashi”. 

Ndërsa, lidhur me situatën në degën e LDK-së në Prizren, ku ka dhënë dorëheqje kryetari Eqrem Kryeziu, Beqiri ka bërë të ditur se, do të shpallen zgjedhje të brendshme, nga ku do të dalë udhëheqësia e re.

______________________________________

Mblidhet LDK, për të vendosur për koalicionin me AAK dhe Nisma

Këshilli i Përgjithshëm i LDK-së, është mbledhur sot, ku do të diskutohet dhe vendoset për atë se a do të hyjnë në koalicion paszgjedhor me AAK-në dhe Nisma-n. 

Lideri i Lidhjes Demokratike të Kosovës Isa Mustafa, ka nënshkruar një marrëveshje koalicioni paszgjedor, për qeverisje të përbashkët me AAK-në dhe Nisma-n, por deri sot ende ky vendim nuk e ka marrë përkrahjen e Këshillit të Përgjithshëm të partisë. 

Në deklarime të ndryshme nga zyrtarë të lartë të kësaj partie, ka pasur edhe zëra që kanë kundërshtuar që AAK-ja si parti me vetëm 9% të votave, të marrë postin e kryeministrit. 

Në këtë takim do të vendoset edhe për cështje tjera. Nga këtu do të dihet edhe shefi i ri i grupit parlamentar të LDK-së.