Ministri i Mjedisit dhe Planifikimit Hapësinor (MMPH), Dardan Gashi, ka pritur në kabinet dy kryetarët e Mitrovicës, asaj veriore Goran Rakiq dhe jugore Agim Bahtiri, si dhe përfaqësues nga Ambasada e Shteteve të Bashkuara të Amerikës dhe Bashkimi Europian.

Sipas një komunikate të MMPH-së, në këtë takim ministri Gashi është treguar i gatshëm për bashkëpunim me dy kryetarët.

“Shprehu gatishmërinë e nivelit qendror të qeverisë së Republikës së Kosovës të bashkëpunojë ngushtë me të dy kryetarët e Mitrovicës në të gjitha aspektet për normalizimin e marrëdhënieve ndër-etnike, investimeve në këtë dy komuna dhe implementimin e ligjeve në fushat përkatëse”, ka thënë Gashi, thuhet në komunikatën e MMPH-së.

Ndër temat e diskutuara ishte kthimi i sigurt i qytetarëve në të dyja pjesët e qytetit, aspekti i ndërtimit dhe rindërtimit, ku u ritheksua se mbetet në fuqi ndalesa e ndërtimeve si në jug ashtu dhe në veri të qytetit.

Të pranishmit u dakorduan për të vazhduar takimet e radhës në mënyrë që të gjenden zgjidhjet e duhura për çështjet që kanë të bëjnë me të mirën e përbashkët.