Anëtari i KQZ-së nga radhët e PDK-së, Ilir Gashi si duket ka njohuri më të mëdha se të tjerët, sa i takon numrit të deputetëve që partia e tij ka brenda subjekteve të tjera.

Teksa ka komentuar në një postim të tij në Facebook, Gashi ka thënë se ai e di sakt se në cilat parti sa deputetë ka “rekrutuar” PDK-ja, parti kjo që sipas tij, nuk do ta ketë problem që të formojë Qeverinë.

“Shoq 5 deputetë brenda LDK-së, 1 brenda Vetëvendosjes, 1 brenda AAK-së dhe Nismës… Tashmë punë e kryer flasim më vonë”, ka qenë njëri prej komenteve të Gashit, pasuar nga një koment tjetër se ai di se “çka po zihet këndej”.

Ilir Gashi gjithashtu ka pohuar se kur vjen puna për “lojëra” prap PDK është e para, duke thënë se kushdo që do të bëj lojëra mund sërish të matet me ta.

Ditët e fundit është spekuluar se PDK ka filluar “gjahun” e saj për deputetët e partive opozitare, në mënyrë që të mos ketë problem që të formojë Qeverinë.