Ky është kërcënimi që i arrestuari për terrorizëm i kishte bërë ish ambasadores Jacobson
Njëri nga të arrestuarit për terrorizëm në operacionin e përbashkët të policisë italiane dhe asaj kosovare, kishte kërcënuar edhe ish ambasadoren amerikane në Kosovë, Tracy Ann Jacobson. Ai kishte shkruar se ajo duhet të dënohet sipas Sheriatit.
Lajme
Policia italiane në bashkëpunim me policinë e Kosovës, kanë arrestuar 4 kosovarë të dyshuar për terrorizëm. Tre prej tyre janë arrestuar në Breshia të Italisë dhe njëri në Kosovë, në një fshat të Hanit të Elezit, raporton lajmi.net.
I arrestuari në Kosovë është 48 vjeçari Samet Imishti, dhe ai dyshohet se ka bërë nxitje të terrorizmit, përmes thirrjeve publike në rrjetet sociale.
Një kërcënim i tillë përmes Facebook-ut, i ishte drejtuar edhe ish – ambasadores amerikane në Kosovë, Tracy Ann Jacobson.
“Qeveria hebreje amerikane thotë se qeveria e re do të luftojë korrupsionin. I them kësaj zonje se deri sa ata janë këtu, nuk do të ekzistojë drejtësia në Kosovë. Kjo jobesimtare meriton dënim me sheriat (ligji islam)”, kishte shkruar ai në kërcënimin e tij publik.
Për arrestimin e Imishtit, në Kosovë kishin ardhur edhe forca policore italiane, ato të njësitit anti-terrorizëm. /lajmi.net