Besart Berisha ka kërkuar sërish kohë për t’i kthyer përgjigje Gianni De Biasit, nëse do t’i përgjigjet pozitivisht ftesës për t’u grumbulluar me Kombëtaren ose jo në edicionin e ardhshëm.

Sulmuesi kosovar luan në Australi me skuadrën e Brisbane Roar dhe në dy sezonet e fundit ka shkëlqyer duke u shpallur golashënuesi më i mirë i kampionatit.

“Kam folur me Besartin dhe më ka thënë se duhet ta pres edhe disa ditë. Është shumë i angazhuar te skuadra e vet dhe i duhet pak kohë të reflektojë dhe të bëjë llogaritë e tija. Unë ia kam thënë hapur se do të ishte një pedanë e rëndësishme për Kombëtaren shqiptare në këtë fushatë kualifikuese dhe se mund të lërë gjurmë. Tani vendimi i takon atij. Jam në pritje’, ka deklaruar De Biasi për “Panorama Sport”.

Nga ana tjetër Berisha ka probleme me largësinë, sepse druhet se udhëtimet e gjata dhe të shpeshta Australi-Shqipëri dhe anasjelltas mund të ndikojnë në rendimentin e tij te skuadra e ardhshme, Melbourne Victory, me të cilën firmosi në muajin janar një marrëveshje paraprake, ku do të përfitojë rreth 1.5 milion dollarë në vit.