WhatsApp padit kompani izraelite, e akuzon se e përdori aplikacionin për spiunazh
WhatsApp po hedh në gjyq një kompani izraelite, për të cilën po pretendon se qëndronte pas një sulmi në internet. Sipas platformës, firma instaloi përgjues në telefonat e përdoruesve dhe synoi mbrojtësit e të drejtave të njeriut, gazetarët, disidentët politikë, diplomatët dhe zyrtarët e qeverisë.
Auto & Tek
Shërbimi i mesazheve, në pronësi të Facebook, paraqiti të martën ankesën kundër ndërmarrjes ‘NSO Group’ në Gjykatën Federale Amerikane, transmeton lajmi.net.
“Kjo duhet të shërbejë si një paralajmërim për kompanitë e teknologjisë, qeveritë dhe të gjithë përdoruesit e internetit,” shkroi shefi i WhatsApp-it Will Cathcart në një edicion në Uashington Post të martën.
“Mjetet që mundësojnë mbikëqyrje në jetën tonë private po abuzohen, dhe përhapja e kësaj teknologjie, që qëndron në duart e kompanive dhe qeverive të papërgjegjshme, na vë të gjithëve në rrezik,” tha ai.
NSO, një kompani që prodhon, shpërndan dhe operon teknologjinë e mbikëqyrjes, përdori serverët WhatsApp, të vendosura në Shtetet e Bashkuara dhe gjetiu, për të dërguar softuer spiunazhi në rreth 1.400 smartfonë dhe pajisje në prill dhe maj, sipas ankesës së WhatsApp. Objektivat përfshinin “të paktën 100 mbrojtës të të drejtave të njeriut, gazetarë dhe anëtarë të tjerë të shoqërisë civile në të gjithë botën”, sipas Cathcart.
Softueri ka për qëllim të kryejë “mbikëqyrje të përdoruesve specifikë të WhatsApp”, thuhet në ankesë. Synimet përfshinin vende të tilla si Meksika, Emiratet e Bashkuara Arabe dhe Mbretëria e Bahreinit. Klientët e NSO-së përfshijnë agjencitë qeveritare në ato vende, si dhe subjektet private, sipas ankesës. Megjithatë, ankesa nuk përfshin asnjë tjetër të pandehur, përveç NSO Group dhe kompanisë mëmë, Q Cyber Technologies.
NSO Group tha në një deklaratë të mërkurën se kundërshton pretendimet dhe “do t’i luftojë fuqishëm ato”.
“Qëllimi i vetëm i NSO-së është të sigurojë teknologji për agjencitë e licencuara të inteligjencës qeveritare dhe zbatimin e ligjit për t’i ndihmuar ato të luftojnë terrorizmin dhe krimin e rëndë. Teknologjia jonë nuk është e dizajnuar ose e licencuar për përdorim kundër aktivistëve të të drejtave të njeriut dhe gazetarëve”, shtoi ndërmarrja.
WhatsApp dhe firma mëmë Facebook po kërkojnë nga gjykata dëmet e të paktën 75,000 dollarëve, plus tarifat e avokatëve dhe çdo dëm tjetër që do provohet në gjykim. /Lajmi.net/
