Mbrëmjen e 1 prillit, rreshteri Muhamed Lika u vra në hyrje të banesës së tij në Kaçanik.

Rastin për lajmi.net e konfirmoi zëdhënësi i rajonit të Ferizajt, Kanun Veseli, ku tha se fillimisht viktima u gjet në hyrje të ndërtesës në gjendje të rëndë dhe se pas transportimit në Spital, rreshteri nuk arriti t’i mbijetoi plagëve dhe ndërroi jetë.

“Më 01.04.2025, rreth orës 23:00, kemi pranuar një informacion se një person është plagosur dhe gjendet në gjendje të rëndë në hyrje të ndërtesës së tij, në rrugën “Idriz Seferi” në Kaçanik. Viktima është një pjesëtar i Policisë së Kosovës Në vendngjarje, përveç njësive policore, ka dalë edhe ekipi i emergjencës së Kaçanikut, të cilët e kanë transportuar në Qendrën e Mjekësisë në Kaçanik”, pati deklaruar Veseli.

Veseli ka thënë se ende nuk dihen motivet e kësaj ngjarje, derisa të dyshuarit janëende në arrati, sakaq ekipet policore vijojnë kërkimet për gjetjen e tij.

Ndërkaq sot, kryeprokurori i Prokurorisë Themelore në Ferizaj, Burim Çerkini, ka dhënë detaje të reja lidhur me vrasjen e rreshterit të Policisë së Kosovës, Muhamed Lika.

Sipas tij, dy të dyshuarit janë larguar në këmbë nga vendi i ngjarjes dhe deri më tani nuk ka informacione që viktima kishte pasur ndonjë problem me dikë.

Në një konferencë për media, Çerkini ka thënë se bazuar në provat e mbledhura, autorët e dyshuar janë parë duke u larguar nga banesa ku ndodhi vrasja.

“Nga ajo që shihet deri më tani, ata kanë ikur në këmbë. Nuk kemi të dhëna që kanë shfrytëzuar ndonjë veturë apo ndonjë mjet tjetër për t’u larguar nga vendi i ngjarjes”, tha ai.

Madje ai shtoi se në vitin 2021, lokalit të tij i ishte vënë flaka.

Megjithatë, Prokuroria Themelore në Ferizaj thotë se deri më tani nuk ka gjetur ndonjë lidhje mes djegies së lokalit dhe vrasjes makabre që tronditi Kaçanikun mbrëmë.

Tutje për rastin ka reaguar edhe ministri i Punëve të Brendshme, Xhelal Sveçla, i cili u bëri thirrje dorasëve të dorëzohen në Polici, pasi i gjithë aparati shtetëror është i mobilizuar të zbulojë të dyshuarit.

“Sulmi ndaj çdo pjesëtari të Policisë së Kosovës është sulm i drejtpërdrejtë ndaj ndaj rendit, institucioneve dhe sigurisë së Republikës së Kosovës”, ka shkruar ai.

“Ftoj dorasin apo dorasit që sa më parë të dorëzohen në organet e rendit, meqë i gjithë aparati shtetëror pa hezitim dhe pa kursim është i mobilizuar të zbulojë dhe arrestojë të gjithë ata që janë përfshirë në këtë vrasje”, vazhdon reagimi i tij.

Ndërkohë, familjarët, kolegët dhe miqtë e rreshterit që humbi jetën, janë të tronditur nga vrasja e tij.

Familja ka njoftuar se Muhamed Lika është varrosur sot pas namazit të ikindisë, në fshatin Shtrazë të komunës së Kaçanikut.

Hetimet po vazhdojnë ende, ndërsa Prokuroria po punon për të zbardhur motivin dhe për të sjellë para drejtësisë përgjegjësit e kësaj vrasjeje tronditëse./Lajmi.net/