Arrestimi i inspektorit Florian Bushi i cili i kishte dërguar përgjime sekrete një të dyshuari si vrasës me pagesë ka shkaktuar “tërmet” tek institucioni më i rëndësishëm i sigurisë në vend.

Pas kësaj ngjarje, kontrolli i brendshëm ka nisur një inspektim tek të gjithë punonjësit e dyshuar për veprimtari të paligjshme. Kontrolli ka zbuluar edhe të paktën dy oficerë të tjerë që kishin të fotografuar në telefonat e tyre të dhëna që konsiderohen sekrete, shkruan ‘BoldNews’.

Gjithçka ka nisur pas një urdhëri të kreut të SHISH, Visho Ajazi Lika për ndalimin e telefonave celularë në ambientet e punës. Por duket se ky urdhër nuk është zbatuar nga të gjithë punonjësit, pasi disa prej tyre nuk i kanë dorëzuar telefonat në hyrje të SHISH, duke hedhur dyshime të forta për veprimtarinë e tyre.

Inspektorët kishin të fotografuar me telefonat e tyre celularë materiale sekrete. Ende nuk ka prova se këto të dhëna mund të jenë përdorur prej tyre, por SHISH kërkon hetimin e dy inspektorëve. Për dy të dyshuarit është marrë masa e shkarkimit nga detyra, ndërsa çështja pritet të merret në hetim nga Prokuroria e Tiranës.