Sot shënohen gjashtë vjet nga konfirmimi i rasteve të para me COVID-19 në Kosovë. Rastet e para u diagnostikuan më 13 mars 2020 në Departamentin e Mikrobiologjisë në Institutin Kombëtar të Shëndetësisë Publike të Kosovës.

Sipas të dhënave zyrtare, gjatë periudhës nga 13 marsi 2020 deri më 13 mars 2026, në Kosovë janë testuar mbi 2 milionë mostra për SARS-CoV-2, raporton lajmi.net

Nga këto teste janë konfirmuar 276,300 raste pozitive, ndërsa 3,238 persona kanë humbur jetën si pasojë e virusit.

Autoritetet shëndetësore kanë theksuar se, megjithëse vendi u përball me një virus të panjohur në fillim të pandemisë, institucionet arritën të organizohen dhe të ndërmarrin masa që u vlerësuan edhe ndërkombëtarisht.

Sipas tyre, koordinimi ndërinstitucional, shkëmbimi i informatave në kohë reale dhe vendimmarrja e përbashkët luajtën rol kyç në menaxhimin e pandemisë.

IKSHPK thekson se sot sistemi i shëndetit publik në Kosovë është më i përgatitur për të identifikuar, monitoruar dhe reaguar ndaj sfidave të ngjashme shëndetësore në të ardhmen./Lajmi.net/