Ministri i Jashtëm i Serbisë, Marko Gjuriq, deklaroi sot se Botsuana ka riafirmuar mbështetjen e saj për qëndrimin serb lidhur me Kosovën, duke e cilësuar këtë si një akt miqësie dhe partneriteti.

Sipas tij, Serbia dhe Botsuana ndajnë të njëjtin qëndrim për rëndësinë e “respektimit të së drejtës ndërkombëtare” si bazë për ruajtjen e paqes globale, transmeton lajmi.net.

Ministri i Jashtëm i Botsuanës, Phenyo Butale, tha se të dy vendet bashkohen në respektimin e integritetit territorial dhe parimeve ndërkombëtare, duke nënvizuar se këto vlera përbëjnë themelin e politikës së jashtme të Botsuanës.

Në konferencën e përbashkët për media, Gjuriq pretendoi se Botsuana ka qenë “konstante” në mbështetjen e saj për pozicionin serb lidhur me shpalljen e pavarësisë së Kosovës, të cilën Beogradi e quan “të njëanshme”.

Ai shtoi se e ka informuar homologun e tij për zhvillimet e fundit në Kosovë, duke e cilësuar si thelbësore mbështetjen e Botsuanës për sovranitetin dhe integritetin territorial të Serbisë.

Gjuriq e mbylli deklaratën duke theksuar se Serbia dhe Botsuana, sipas tij, ndajnë një vizion të përbashkët për rëndësinë e së drejtës ndërkombëtare në marrëdhëniet ndërkombëtare — një deklaratë që vjen në vijim të qasjes së tij tashmë të njohur ndaj çështjes së Kosovës./lajmi.net/