Diplomacia kosovare pret njohje të reja dhe lëvizjet e para në këtë drejtim mund të bëhen javën e ardhshme.

Kështu të paktën ka thënë në një intervistë për Epoka e Re, Zëvendës Ministri i Punëve të Jashme, Petrit Selimi i cili ka thënë se procesi i njohjeve është i pandalshëm dhe njëherësh është prioritet për Kosovën.

“Procesi është pandalshëm dhe me gjeografi globale. Priten disa njohje në javët në vijim, të cilat e thellojnë subjektivitetin dhe njohjen ndërkombëtare të Kosovës”.

“Ministri Enver Hoxhaj ka disa takime këtë javë në disa kontinente që mund të sjellin lëvizje në këtë drejtim. Ky proces është i pandalshëm dhe njëdrejtimësh”.

“Nga Konferenca e Ambasadorëve është e qartë se organizatat multilaterale dhe pesë vendet anëtare të BE’së që nuk e kanë njohur Kosovën janë prioritet i MPJ’së”.

Selimi thotë se Kosova ka pritje reale se qëndrimi neutral i shteteve të BE’së do të zbehet tërësisht, pas njohjes së BE’së.

Ai thotë se në periudha afatgjata Serbia “s’ka qare”, pos ta njoh Kosovën.

“Institucionet e BE’së nuk kanë qëndrim uniform ndaj Kosovës.

“PE e ka njohur Kosovën dhe bën thirrje të vazhdueshme për njohjen e mëtutjeshme të sovranitetit të saj dhe pavarësisë, ndërsa Këshilli Europian përbëhet edhe prej shumë shteteve që nuk e kanë njohur Kosovën, prandaj ka edhe qasje më neutrale, edhe pse vitet e fundit e ka njohur realitetin e Kosovës së pavarur dhe mundësinë e hyrjes në marrëdhënie kontrakutale me Kosovën”.

“Kemi pritje reale se neutraliteti i BE’së do të zbehet pas njohjes së tërësishme të BE’së. Në fund të ditës edhe vet Serbia s’ka opsione të tjera afatgjata, pos ta njohë Republikën e Kosovës”.

Për numrin dy të diplomacisë kosovare, ish-ministri Skënder Hyseni ka qenë një “ministër për keqardhje”. ‘

Selimi thotë se dështimi më i madh i diplomacisë ka qenë pikërisht në kohën e ministrit Hyseni.