Ekipi shqiptar nga Kosova, Bad News Eagles sot (e diel) zhvillojnë një ndeshje shumë të rëndësishme në Majorin e CS:GO në Paris.

BNE do të përballen me ekipin Apeks në ndeshjen e tyre të tretë, ku ju kanë mbetur edhe dy fitore për t’u kualifikuar tutje në fazën ‘Champions Stage’.

Në një intervistë për HLTV, lojtari i ekipit shqiptar Rigon ‘rigoN’ Gashi ka folur rreth kundërshtarit të tyre dhe rreth kualifikimit në fazën tjetër.

“Ne kemi mposhtur një herë ekipin Apeks dhe do ta shohim. Por, ndjehem shumë optimist kundër tyre. Është Majori ynë i tretë në CS:GO, dhe ne duam të shkojmë tutje”, ka thënë rigoN.

Nga 16 skuadra sa janë në garë, vetëm tetë më të mirat do të kalojnë në këtë fazë.

Një grup çmimesh prej 1.250.000 dollarësh ndahet për skuadrat pjesëmarrëse në BLAST Paris Major, ku nuk mungojnë as fitimet e mëdha nga stikerat virtual të lojës.